ఎప్పట్లాగే ఆ యువకుడు ఏనుగు దగ్గరకు వెళ్లి పనిచేసుకుంటున్నాడు. కానీ ఏమైందో ఏమో ఆ ఏనుగు ఒక్కసారిగా విరుచుకుపడి తొండంతో బలంగా విసిరికొట్టింది. తల, కాలికి తీవ్రగాయాలై పడిపోయిన అతణ్ని హాస్పిటల్ తరలించినా లాభం లేకుండా పోయింది. ఈ దారుణ ఘటన హైదరాబాద్ నెహ్రూ జూ పార్క్ లో జరిగింది. పాతబస్తీ కాలాపత్తర్ కు చెందిన మహ్మద్ షాబాజ్.. జూపార్క్ లో యానిమల్ కీపర్ పనిచేస్తున్నాడు. విధుల్లో భాగంగా శనివారం మధ్యాహ్నం 3 గంటలకు గజరాజు దగ్గరకు వెళ్లి పనిచేస్తున్నాడు. కానీ ఉన్నట్టుండి అది తొండంతో దాడికి దిగి షాబాజ్ ను విసిరికొట్టింది.
తలతోపాటు కాలికి తీవ్రంగా గాయాలై అపస్మారక స్థితిలో పడిపోయిన బాధితుణ్ని మిగతా సిబ్బంది వెంటనే అపోలో హాస్పిటల్ కు తరలించారు. అయితే అతడు ట్రీట్మెంట్ తీసుకుంటూ ప్రాణాలు కోల్పోయినట్లు డాక్టర్లు ప్రకటించారు. జూపార్క్ అసిస్టెంట్ క్యూరేటర్ సరస్వతి కంప్లయింట్ మేరకు బహదూర్ పురా పోలీసులు కేసు నమోదు చేశారు.
