కాంగ్రెస్ అగ్రనేత, ఎంపీ రాహుల్ గాంధీ పార్లమెంటులో అడుగుపెట్టారు. ఆయన రాకను స్వాగతిస్తూ I.N.D.I.A. కూటమి సభ్యులు చప్పట్లతో ఆహ్వానం పలికారు. సభ్యత్వాన్ని పునరుద్ధరిస్తూ లోక్ సభ సెక్రటేరియట్ నిర్ణయం తీసుకోవడంతో ఆయన సభలోకి అడుగుపెట్టారు. రాహుల్ గాంధీకి లైన్ క్లియర్ కావడంపై ఆ పార్టీ అధ్యక్షుడు మల్లికార్జున ఖర్గే ఆనందం వ్యక్తం చేశారు. అటు దేశవ్యాప్తంగా పార్టీ లీడర్లు, కార్యకర్తలు సందడి చేశారు. అవిశ్వాస తీర్మానం చర్చ జరగనున్న వేళ రాహుల్ అడుగుపెట్టడంతో విపక్ష కూటమి I.N.D.I.A సభ్యుల్లో సంతోషం కనిపించింది.
రాహుల్ గాంధీకి విధించిన జైలు శిక్షపై సుప్రీంకోర్టు ‘స్టే’ విధించడంతో ఆయనకు మార్గం సుగమమైంది. నరేంద్ర మోదీని ఇంటి పేరుతో దూషించిన కేసులో సూరత్ సెషన్స్ కోర్టు ఆయనకు రెండేళ్ల జైలు శిక్ష విధించింది. దీన్ని గుజరాత్ హైకోర్టులో సవాల్ చేస్తే అక్కడా రాహుల్ కు నిరాశే ఎదురైంది. సెషన్స్ కోర్టు తీర్పును హైకోర్టు సమర్థించడంతో రాహుల్.. సుప్రీంను ఆశ్రయించారు. కింది కోర్టుల నిర్ణయం ఇంకా క్లారిటీగా ఉండాల్సిందని అభిప్రాయపడ్డ సర్వోన్నత న్యాయస్థానం.. జైలు శిక్షపై స్టే విధించింది.
